食過咁多次放題，有大約6成都有飲品任飲，呢間都唔例外，不過除左普通既飲品之外，最特別既係有即沖柚子蜜同埋菊花露，係其他食放題既地方係未見過架。
其他飲品方面，都係果幾樣，汽水，綠茶等等，種類都算多。
前菜好似沙律螺肉等都係以自助形式，大家可以去凍櫃到自己拎。
和式前菜， 醬汁既濃度適中，如果每兜既份量多少少就更加好。
刺身新鮮爽口，三文魚肥美，非常厚切，重鮮味，甜蝦都啖啖肉，至於生蠔，送黎時隻隻都好新鮮，食落唔腥，滑入口真係好滋味，加埋檸檬汁吊起個味真係好好味呀！至於帶子同蟹捧就普普通通。
魚生實在太好味，所以我地都encore再一次。不過當然第二轉就無叫咁多啦。
天婦羅方面，粉漿超薄，上菜時仲熱辣辣，令到成件事好好食！
炸物方面全部都炸得好香口，口感特別香脆。特別一提炸蟹鉗，金黃色脆，內裏釀滿左蝦肉，爽口彈牙。
酥炸雞軟脆骨表面呈金黃色，粒粒脆口又香口，夠入味。
燒雞翼燒到微燶，再塗上一層蜜糖，外皮脆內裡雞肉嫩，一口咬落去，雞肉仲能保留好多肉汁，至於大蝦串燒好香，蝦肉好爽口，如果上面既七味粉落返少D好更加好。
牛舌燒得好香，唔韌好淋身，配埋秘製醬汁好味道！羊架方面就普普通通，味道同火喉都算OK。
甜品方面選擇都算多，好少見放題有啫喱，涼粉，布丁呢D選擇，真係估你唔到，最好味果樣當然係布丁，好味到我仲食左3個添呀。
埋單每人$251 左右，咁既價錢，有生蠔食，落單既野又到齊，算唔錯架啦，期待DSE 完全之後再黎食獎表妹食多餐。
