富田和食亭 (Closed)

之前食過呢間富田和食亭放題，一直想黎食多次，今日終於有機會同朋友黎食，呢間日式放題真係非常抵食。黎到5:15pm，放題仲未開始，已經見有人排隊等位。今次四個人食，店員安排我地坐卡位，坐位餐桌都夠闊落，坐得都幾舒服。點野食紙一系列唔同種類、顏色順住咁排好，都幾方便，可以即刻攞到。依照一向慣例，我地當然首先叫刺身食啦。三文魚、希靈魚、北極貝、蟹棒、油甘魚、鮑魚片、吞拿魚、八爪魚、甜蝦，基本上有嘅我地都叫黎試下，刺身都幾新鮮，味道幾鮮甜，特別係三文魚，紋理清晰，色澤鮮明。鹽燒海蝦、雞軟骨串海蝦灑左椒鹽去燒，食落咸咸地好惹味；雞軟骨串燒得香脆唔乾身，幾好食。羊架灑上黑胡椒嘅羊架燒得好靚，咬落肉質軟嫩，冇羊羶味，脂肪比例均衡。可以叫火鍋，火鍋配料都幾多選擇，叫左肥牛片、唐生菜、鮮冬菇、秀珍菇等等，材料都幾新鮮，蕃茄湯底味道唔錯。自助飲品櫃，都有唔少選擇，啤酒、汽水、果汁都有。自助甜品櫃，甜品有雪糕、雪條、布甸、泡芙、豆腐花。呢隻牌子嘅豆腐花幾好食。假日5:30至7:00pm入座，成人都係$168，加埋一，二百蚊都唔駛，非常抵食。