桂林米粉

夜晚9點幾去到，見到入面冇人諗住會唔會準備收工，點知老闆勁nice招呼我入去坐仲拿拿臨送上杯熱茶，係真係一杯熱茶！好似好耐冇飲過送既茶係有熱度！

餐牌好簡單，食物款式唔算多，猶豫一陣食咩，老闆娘即刻介紹：牛腩酸筍粉好好食wor! 牛肚都好食呀，但唔知你食唔食酸筍wor!

素聞抵食又大碗，所以叫左碗牛肚酸筍粉，免得太多肉。多口問老闆一句：油菜有咩揀？
老闆：生菜lor!但碗面入面有wor!你喜歡我送多兩條俾你，唔使嗌呀！
呢啲真係小店先有既人情味👍🏻👍🏻👍🏻

牛肚酸筍粉

$34

話口未完，碗面已送到，嘩👍🏻大碗到！真係好抵食，牛肚切得好薄又好多，豬骨湯底清清地但唔錯，食完唔口渴，米線略硬，但聽聞呢個係桂林米粉特色，所以整體感覺我覺得都可以接受！

拿拿臨食，好怕阻人收鋪，但老闆娘好好叫我最緊要慢慢食佢地唔趕。坦白說，味道不至於一流，但價錢咁抵，有人情味，服務又窩心，我真係搵唔到理由唔再黎食！

希望大家都一齊支持小店！