朗豬爸爸小廚 (Moved) New Location

放假鍾意食個醒神早餐，今日去朗豬爸爸小廚，最鍾意食佢嘅雪菜米，配漢堡扒、煎蛋、方包，飲番杯熱咖啡，咁就最完美，26蚊呢個餐真係好抵食！除咗食粉麵餐，都可以選擇扒餐，都係29蚊，好肚餓嘅時候，叫29蚊呢一個扒餐，兼有粉麵食，係最飽嘅。熱咖啡，佢呢度整得好夠濃，我最鍾意飲，但係其他飲品，相對係淡味啲嘅。成個餐係咁大分㗎！雪菜米仲會附送粟米粒粒，真係健康均衡飲食。 牛油方包嘅食法，我通常都係用煎蛋同埋漢堡扒，夾埋一齊，當成一個三文治食，因為其實呢啲早餐都係煎熟而以，最緊要唔好太油膩，三文治食法有口感，好味啲。我最鍾意食雪菜米，呢度嘅米粉唔會浸到淋，而且分量好大，食落又爽口。雪菜鹹鹹哋，浸落湯度愈食愈開胃。粟米粒粒好甜，一朝早食咁大分量嘅早餐好滿足！再嘆埋杯咖啡，一絕！有時間真係會多啲嚟食早餐呀！