雲桂川冰室 (Closed)

今日入開屯門影相打卡，係附近搵咗間茶記坐低食個下午茶。呢間真係好抵，份量十足又好食，下次再入屯門會再幫襯😋。我哋叫咗兩個下午茶餐，一個炸雞髀薯角同一份流心芝士火腿西多士。炸髀薯角份量極多，雞髀大大隻、啖啖肉，都只係$36，真係好抵！薯角係新鮮即炸，所以好金黃香脆，抵食！平時食普通西多士多，第一次食流心芝腿西多士。西多士入面都係好足科，熱辣辣嘅芝士仲好拉絲😍。因為份量好夠，食完兩個下午茶餐都已經好夠飽。但見到餐牌有好多川菜，朋友話好想試呢度嘅辣野，所以叫咗個水煮牛肉。嚟到份量都係一如既往極足料，好多牛肉！辣度唔算太辣，但好夠味，味道可以比美出面川菜嘅水煮魚/牛。牛肉亦夠淋、無筋，真心推薦大家可以試吓佢嘅川味小菜🤤。下次再嚟會試埋水煮魚同口水雞😍。