高橋沾麵製作所 (Closed)

高橋沾麵製作朋友一向鍾意食沾麵，路經奧海城入food court見倒呢間幾似樣咁就坐低試下。可能喺food court 既關係，價錢比出面既拉麵店相對平少少，所以就叫左個豪豪地既極上3L廣島蠔龍蝦沾麵 $98 (都仲未過百)同平平地既特製八代海赤海老叉燒拉麵 $66。上餐都算幾快，一見倒個賣相幾驚喜，個炸蠔勁大隻，皮脆肉軟。個龍蝦湯仲起緊泡，熱辣辣正！入面仲有啲龍蝦肉同豬肉，幾足料。然後面底我係覺得幾唔錯，夠彈牙，叉燒就正正常常啦！海老叉燒拉麵個蝦味都幾出，拉面底又係好食，彈而唔黏，我平時細食，成日食唔晒一碗拉麵，今次食下食下竟然食晒，自己都嚇親！總括嚟講性價比中高，food court 竟然有間咁高質既拉麵當然要推介比大家。