環境都好乾淨，唔逼，坐得都舒服嘅。
見到每台都有回鍋肉，應該係招牌菜，所以點左，大大碟先$88，我好怕食肥豬肉，頂唔順陣豬騷味，但呢個五花腩冇壓味，又唔會太膩，豆瓣醬炒得好惹味但唔會太鹹，少少🤏辣，唔太食得辣嘅人都食到，椰菜都炒得好脆好爽口，高分！
紅油抄手超大碟，8粒大大粒先$65，真係好抵，醬汁偏甜，好多蒜蓉加分，我超鍾意蒜蓉。粒粒都好飽滿，推介！
菜飯阿姐話係即叫即撈嘅，好多菜。
未食過燻蛋，見人叫我又試左一隻，$15，其實就係淮鹽味嘅糖心蛋，未食過嘅可以一試，都幾得意。
炸饅頭係重頭戲，好期待！外皮脆入面鬆軟，一定要點煉奶啦梗，$25/3隻，我食左2隻，其實冇人搶我可以啪晒3隻㗎。
$10茶錢再加一，咁多野都係食先$270，呢個質素好過連鎖上海餐廳多多聲，值得一試。
