Fini's (石水渠街)

Open Now

Now Closed

契妹從網上飲食情報得知灣仔新開咗間酒吧餐廳「Fini's」，閒日歡樂時光極之爆場，所以就擇日約契哥去探個究竟。店子位於石水渠街近皇后大道東嘅一角，其火紅嘅門面真夠搶眼。酒吧區樓底高高，頭頂用上無花無假嘅意粉麵條裝飾，明確地道出餐店主打意大利菜。正門及落地玻璃窗全線打開哂，唔怪得知會咁受外籍飲客歡迎啦。不過酒吧暗角有個大大嘅薄餅爐，細佬咁啱坐正喺個爐隔離，直接感受到強勁嘅熱力；春天還好有風吹到入黎，不過夏天一到就唔知會唔會唔夠冷氣囉。週一至五嘅歡樂時光限定為傍晚五至七，大多客人都係以$108嘅任飲啤酒配任食雞翼及薯條作目標，部份食客更早於四點幾就黎霸定位，踏正五點鐘可即飲第一罐啤酒。小肥早極都要五點先走得人，跑到餐廳都遲咗成五分鐘。攞好位兼落埋單，姐姐先送上啤酒、紙巾及餐具。原來任飲歡樂啤酒為罐裝意木利品牌Peroni，另跟玻璃杯上，感覺都好衛生。等咗大約八分鐘左右先有薯條食。真係冇諗過啲可無限添加薯條居然係即叫即炸，每條都咁熱辣辣喎，個人只係略嫌佢瘦得滯，唔夠鬆化，不過任食黎講絕對比預期高質！食住薯條再等多八分鐘，終於有火辣嘅炸雞翼食，份量係每人一隻雞全翼，當中雞槌同雞中翼已預先切開。