呢度取名一合，就係想酒客細飲慢嚼，品味清酒細膩嘅味道。
清酒SET:一SET有三款：純米／純米原酒／純米大吟釀。一次三款可以試到自己最適合嘅味道，再慢慢了解清酒嘅品味。
純米－蒼空：以水、米麴和米所做的「純米」日本酒，味道都幾易入口。味道覺得同未醒酒嘅紅酒咁樣，偏重入口時帶來的味道。
純米原酒－平泉：原酒即係無加水去進行調整酒度，味道較醇同香。飲過蒼空後會覺得佢辣左少少，味道係三種入面最突出嘅一杯。
純米大吟釀－温泉：一入口覺得係最甘甜，米香味十足而且餘韻非常之長。所謂純米大吟釀即係用精磨度在50%或以下嘅米粒釀製，用嘅米芯相對地多好多的了，所以特別矜貴，認為整體味道／後勁／平衡都最好飲的。
前菜二味:秋刀魚/鰤魚。雖然係罐頭食品但老細好好人咁將佢地用碟裝盤，心機分都加唔少啦。兩款都係油浸方式腌製，味道又無平時食開嘅咁咸，魚肉都大粒同結實。
鰤魚味道更加有啲似豬肉鬆嘅口感味道。飲清酒時最啱就係食啲油膩少少嘅食物，可以令口腔有啲滋潤，連埋餅乾一齊食口感再舒服一點。
漬物三寶:牛蒡/茄子/蒜頭。平時食日本料理腌漬蒜頭及牛蒡就食得多，茄子都係首次食到。味道偏咸沒有了原先嘅青澀味道。先咬一口茄子，再飲啖清酒效果幾特別。
男爵薯餅：好軟糯，淡淡嘅甜味將酒意一掃而空，而且澱粉豐富啱晒酒得填一填肚，就算之後有下ROUND都可以再飲過。
日式手羽先：燒雞翼～我鐘意食～飲酒點可以無雞翼？整得咸香嘅雞翼，表皮仲係香脆的，腌到咸咸地嘅味道啱晒佐酒。
日式豬肉餃子：好飽滿，除左豬肉入面仲有椰菜及大蒜，肉菜比例啱啱好，食時熱辣辣多肉汁，仲保持爽脆口感。
與好友舉杯暢飲慢慢地傾偈談心。享受下清酒所帶黎嘅悠閒，一樂也。
