

記得同呢位朋友第一次去日本嘅時候去嘅居酒屋都同呢度裝飾好似,即刻有啲重遊舊地嘅感覺

前菜小食揀左個煙燻蠔,入口炭香味幾重仲有微微嘅酒香。雖然經過煙燻但肉質仲係濕潤軟糯,味道偏咸香就咁食會太重味,但因為我地點左清酒,兩者夾埋啱啱好。


有餚點可以無酒?所以第一時間點左支清酒慢慢嘆!呢支係:黑耀-特別純米酒。入口順滑柔軟、帶清甜蜜瓜味同水梨味道,凍飲嘅甜味更濃令酒中的米香昇華,層次提升不少。除左煙燻蠔同之後嘅食物配搭度都好高。



一飲酒就好想食雞翼的了,所以呢個和風炸雞中翼一定無放過。外皮炸到熱辣香脆而內仲係鮮嫩多汁。入口先黎係七味粉孜然粉等混合香料味道,之後就係雞肉嘅甜。加上辛辣味十足,佐酒一流。

燒魷魚一夜干夠晒腍同埋唔會乾爭爭,咸味接近海水嘅濃度。因為經過風乾,魷魚嘅鮮味濃縮起來,質感亦變得較為煙韌更有嚼勁。

因為清酒嘅關係朋友想食啲熱辣湯去驅下酒意,就點左呢個鱈魚鍋。


入面材料好多除左大量鱈魚肉仲有魚頭/豆腐/芹菜仲有白子。鱈魚白子之前都係食刺身多,但估唔到放湯煮熟嘅味道都好好食,口感依然幼滑但就更濃香。配上辛辣味增湯味道更豐富補足左白子本身味淡嘅情況。

而鱈魚肉真係好多鋪到上湯面大件得黎魚肉好嫩。魚嘅甜再混和入湯入面,加上辛辣口感真係食唔停口,仲起到有解酒作用,正

最後仲有啲意猶未盡就點埋個鐵板牛仔腸,填滿剩低嘅少少位。


牛仔腸本身味道清淡,可能同佢本身只係用豬肉牛仔肉加香料而製成有關,但呢度以燒汁增加腸嘅風味令到食起上黎味道層次更多,亦有焦香醬油味。同埋一定唔可以錯過墊底嘅洋蔥,焦香又腍甜好好食。

同時代廣場都只係一街之隔就有間寧靜又有氣氛嘅家庭式居酒屋,價錢仲要十分貼地。下次口痕想飲返杯又多個好地方了