當身邊有人會不斷咁支持同鼓勵你，就要好好珍惜。
不過最緊要係毋忘初心！入正題。
北海道海膽 (半板) $388
因為對上一次嚟係叫原隻海膽，所以今次就試下嚟半板。海膽十分之新鮮，夠creamy，諗起都流口水。海膽份量比配料多，啱晒我呢啲鐘意就咁食嘅人。
日本生蠔 $38@
叫咗4隻試下，手掌大細，爽口，少少海水味同金屬，鐘意輕口味嘅就啱晒。幫你起埋個帶子咁先好。嗌多兩隻先！
北寄貝 $148
味道鮮甜，口感非常爽脆！北寄貝含有豐富OMEGA 3，同埋含有抗膽固醇堆積功能，想心臟好就食多啲啦。
1
池魚 (一份) $288
口感非常爽脆，睇落去好似薄薄哋，但其實個texture好豐富，一啲都唔腥，配咗個柚子汁，點少少食特別清新，鐘意重口味嘅點返豉油一樣好味。再唔係就咁食，感受一下回甘味。
油甘魚 $68、帶子 $38、赤貝 $48
油甘魚一睇就知厚切肥美啦，口感真係一流，我去邊都要食。如果擔心太油膩，最好配wasabi食。帶子鮮同有口感，赤貝都係新鮮爽脆，佢亦都可降膽固醇同血脂㗎！
雞軟骨 $30、鹽燒五花腩 $48、鹽燒牛舌 $33
嚟少少熟食，雞軟骨普普通通，無乜特別。最想講嘅就係五花腩同牛舌，大份兼厚切，尤其係牛舌，厚到一舊分幾次咁咬，如果唔係太大舊！調味熟度都好好，咬落去啖啖汁啖啖肉。
炸准山條 $38
似薯條，但比薯條個質感更厚實，雖然炸得熱氣咗啲，不過下次都會再叫。話晒准山有益嘛。
－－－－－－－－－－－－－－－－－－－－－－－－－－－－－－
老閱同位位客人都好熟，又影相又一齊飲酒，的確係消遣好地方，最緊要係啲刺身掂呀！
店舖位置近太子D出口，沿砵蘭街行到汝洲街，轉入柏樹街再右轉直行就到。5分鐘左右腳程。
