台灣鐵路大排骨滷肉便當
呢個係餐廳嘅其中一款招牌菜，面頭有超大塊嘅酥脆大排骨🐷 入面仲有半肥瘦嘅滷肉，超好餸飯，真係好有台式風味。
麻辣鴨血滷肉湯寬粉
個人幾鍾意食鴨血，呢度嘅鴨血絕對冇令我失望，入口嫩滑，而且麻辣嘅味道同寬粉好夾，入口都幾爽彈🍜
台南花枝卷滷肉便當
係期間限定嘅新品，面頭有台南嘅花枝卷，中間嘅花枝餡幾彈牙。側邊同樣係有滷肉同埋滷蛋🥚
小食
♦️鹽酥炸大腸
每一件炸大腸都非常厚身，而且外層好酥脆，入口唔會太肥膩，重點係佢完全冇內臟味，清洗得好乾淨🥰
♦️小食拼盤
入面有四款小食，包括九層塔雞翼、夜市鹽酥雞、鹽蒜四季豆同埋梅香脆地瓜😙 啱晒三心兩意嘅我哋。
♦️芋泥肉鬆蛋餅
呢個係餐廳另一款招牌菜，蛋餅入面有好綿密嘅芋泥同埋幾惹味嘅肉鬆🍳 芋泥略帶點甜味，同帶鹹味嘅肉鬆相映成趣。
飲品
呢度有幾款台式飲品，款款都好吸引。我哋嗌咗招牌嘅珍珠奶茶，珍珠煙煙韌韌🧋 另外仲有冷泡茶，鳳梨綠茶有淡淡嘅鳳梨後勁🍵
呢間餐廳真係幾抵食，每碟嘅份量都好大，一定會夠飽，仲可以食啖啖經典嘅台灣滋味 。喺尖沙咀返工嘅朋友好值得嚟食吓😄
