由於佢淨係做外賣，拎到返屋企再等咗一陣先至開始食，點都會差少少，尤其是炸嘅嘢，會淋咗啲。
1
鵝肝漢堡不嬲都係我摰愛，見到餐牌上面有，就即刻狗衝去試，結果鵝肝就不過不失，陣油脂甘香味係有嘅，不過就唔係咁濃，有啲乾，無嗰種鵝油喺口𥚃面大爆發嘅感覺。反而塊手打牛肉漢堡呢，就真係好驚喜，一食就食得出貨真價實絕對係自己手打嘅，因為食出嚟真係好唔同。塊扒好厚好多肉汁，食到好有質感，有一粒粒肉粒，有少少煙煙銀銀嘅口感，肉味好重，仲食到有少少黑椒調味，實在係我食過咁多次漢堡包，包括係啲好靚嘅餐廳食過嘅之中最好味嘅漢堡扒。
軟殼蟹又係另一樣我好鍾意食嘅嘢，呢個炸軟殼蟹意粉，唔知係咪擺得來得滯啦，脆就唔好脆啦，𥚃面好多水份，咬落去啲汁會滴出嚟，啲調味淡咗啲。不過隻蟹仲見到個蟹形就幾有誠意。但個意粉呢就好好味，味道同埋面嘅質感都係非常好嘅，見佢落咗洋蔥青椒紅椒所以好香，大大碟我成碟食哂。
加13蚊跟餐有薯條或者蕃薯條，跟埋嘢飲。有少少淋咗，又無調味，就咁比包茄汁，蕃薯甜甜地都幾好味，薯條就麻麻。
幾好啊呢間，應該會令我經常返去幫襯
