最令我期待的是甜品-反沙芋。
先來一杯功夫茶，細細一杯，茶甘味重。
雞絲水晶粉皮 $98
雞絲嫩滑夾著爽脆青瓜絲，還有順滑有彈性的水晶粉皮，粉皮特別薄身切段方便進食。
麻醬滑身濃香，加了芝麻更加香。
滷水鵝片 $198
滷水汁唔會好咸，鵝片滷得夠入味，咬落好有肉香又唔膩，質感淋彈之間，越咬越出味，而且冇渣。
杏汁白肺湯 $168
杏汁味好濃郁又滑，飲完香味久久不散又潤喉，白肺沖得夠乾淨好花時間，心機菜特別好味。
白肺淋滑筋位少，唔使沾醬油已經好好食。飲完好滋補潤肺又養顏。
潮陽炸雙棗 $120
分別是蝦棗及蟹棗，兩者都用料十足，蟹肉一絲絲，質感偏淋有鮮味，外脆內軟夠哂熱辣辣。
蝦棗彈牙爽口，蝦味突出，有一粒燈蝦肉，比較喜歡呢款，必點小食。
寸金紹菜包$240，用紹菜包著蝦肉、冬菇、豬肉等材料，煮法簡單健康，味道清淡微咸。
食得太多肉，點呢款菜最岩，菜吸收肉類同海鮮的鮮味，令紹菜更清甜。
豆醬龍崗雞煲 $168/半隻， 由於多人食所以叫一隻。不過好大隻份量頗多。
肉質肥美嫩滑，雞皮偏厚脂肪多，所以黃油亦多，加上豆醬燜煮特別香，而且不太咸。但雞味不算重。
潮州蠔仔肉碎粥$148， 超多蠔仔好足料。
蠔仔飽滿脹卜卜，仲唔腥夠蠔味，蠔邊爽口，加入柴魚煲粥更鮮甜。潮州粥既好處就是簡單快捷就煲好，因為比較稀，不似綿綿的粥煲好耐，質感會較清爽順喉，冇甘易飽可以食埋之後個麵。
乾煎糖醋麵 $128，幼麵煎得外層脆卜卜，內裡軟彈，保持麵質爽身，值得一讚就是個麵冇鹼水味。
加少少糖同醋，酸酸甜甜味道幾特別，味道不錯。
反沙芋 $108， 期待已久的甜品，廚師花心機做的反沙芋，步驟不算多但費時。
芋頭炸過酥香夠粉綿，外層的糖衣炒得好脆身好甜美。
