來多碗車仔麵 (康寧道) (Moved) New Location

女朋友唔係香港，一個獨男放工又返到充滿美食既康寧街，呢到係平民食堂，選擇都相當多。今日就去咗食車仔麵!以前細個都好鐘意食車仔麵貪佢多餸任揀，但依家啲車仔麵檔愈來愈少，米線就成行成市，而呢間就大膽逆流開張。裏面裝修好新淨，抽氣又好，唔會周圍油淋淋，感覺乾爽。而且環境並唔嘈雜，同朋友/屋企人吹水一流。可惜我無有!(喊)學生廿五蚊就有三餸麵兼夾送野飲，一個字—抵!不過呢，我呢個超齡學生就享受唔到如斯優惠拉。但都係抵食既，因為叫左個三餸麵都係三十蚊有找，仲可以係邊度揾?!蘿蔔，魷魚鬚，牛丸配河粉。叫河粉最怕太油，好彩佢又唔多油，幾滑身同煙UN。魷魚鬚爽口好彈，仲有少少辣汁，而且無腥味，good!蘿蔔好淋，又入哂味，睇黎浸湯浸足鐘數。牛丸大大粒，又彈又香口，完勝譚仔!以性價比黎講，呢到係幾抵食，多餸之餘，份量都幾大，男仔都會夠飽。日日食連鎖店都會悶架，不妨出去試下小店，食返舊時既美食。