老闆火鍋冰室

Open Now

Now Closed

呢間位於元朗嘅火鍋冰室，裝修設計行懷舊風，好有6、70年代冰室嘅味道。可以打邊爐或者炒小菜，天氣咁凍，打邊爐就啱晒。我哋揀咗胡椒豬肚雞窩做湯底。豬肚爽口，雞肉爽滑，而且份量好足，仲有枝竹、酸菜等配料。湯底味道係偏淡嘅，可以試下師傅自製嘅XO醬，味道偏辣但好香好惹味。小食蟹籽墨魚炸油炸鬼，係油炸鬼上面鋪一層墨魚滑，墨魚滑上面鋪一層蟹籽。油炸鬼香脆，墨魚滑爽滑，加埋蟹籽係口裡面卜卜爆開嘅口感好特別。墨魚水上漂。上枱先知係豬皮包住墨魚滑，上面鋪一浸蟹籽。落鍋就知道點解叫水上漂，因為真係浮喺湯面上。豬皮索咗啲湯汁，加埋爽滑嘅墨魚滑一齊食好好味。海鮮菇同油麥菜都好新鮮，魔芋絲爽口。雪花肥牛大大盆，肉質肥瘦均勻，爽滑甘香有牛味。最後整番一榨老闆水果茶，有橙、蘋果、菠蘿、火龍果同青檸，清新解膩。