寶石餐廳 (Renamed) View

今晚入元朗試下懷舊扒房寶石餐廳，門面一整面紅磚牆相當顯眼，入到餐廳散發一種年代感，裝飾枱櫈每一個細節處都滲透懷舊色彩。肚仔有啲餓同老婆點左個鐵板二人餐，有多士，餐湯，沙律，主菜，飲品同甜品。我要左個羅宋湯，老婆就升級做酥皮忌廉湯，紅湯滿滿雜菜，飲落正常，酥皮焗得幾好，不過白湯味道就麻麻，沙律揀左蒜蓉炒雜菜，食落淡淡蒜味，雜菜有口感，比普通沙律吸引。主菜方面我就貪心啲點左鐵板美式雜扒，老婆就係鐵板紐西蘭肉眼扒，兩份鐵板來到嚇左跳，份量超級夠。雜扒有豬扒，雞扒，牛扒同一塊煙肉，每塊扒都有肉味，雞扒仲算嫩口唔柴，牛扒薄薄地都有烤紋，誠意十足。紐西蘭肉眼先誇張，大大塊又夠厚，食落肉味都幾濃，點左五成熟都係六成熟。不過真係太大份食唔哂，最後甜品都食唔落，飽住個肚走人，呢個二人餐真係夠哂三個人食，正宗大件夾抵食。