第五街冰室 (京瑞廣場) (Closed)

今晚放工後仲要聽線上講座，所以冇時間煮飯，於是早少少同仔仔出去石門食晚飯。見到呢間《第五街》冰室有少少懷舊feel，食物種類選擇繁多 ，而且勝在坐位夠大坐得舒服。打開餐牌，真係好厚好多選擇，有扒類、小菜、炒粉麵飯、湯飯，仲有BB乳鴿。我首選想食BB乳鴿，其他就交咗比仔仔揀，結果佢叫咗三個煲。真心好耐冇食BB乳鴿，佢呢個係即叫即炸。食落皮脆肉滑好夠入味，超有驚喜又十分抵食，$38/隻，$70/2隻。冇諗過凉瓜排骨加咗金不換，味道更提升，呢個「金不換凉瓜排骨煲」真真又幾好味啵，而且十分好送飯。「黑椒牛仔骨煲」，牛仔骨十分多，配菜份量亦十分多，而且味道亦不錯。「沙爹肥牛炒粉絲煲」，味道方面夠晒沙爹味，最緊要不太咸，又係送飯首選。最後加多杯經典懷舊飲品，黑牛同雪糕紅豆冰，慢慢嘆住冰凍飲品，一邊聽住線上講座，真係十分爽。