金記冰室 (Closed)

之前聽聞呢間冰室裝修好特別，今日終於都黎試左。裝修走懷舊戲院風格，一入門口就有個售票處裝修既收銀位同出菜處，牆上掛左幾幅搞笑電影海報同以前睇戲既畫，都算有特式。餐牌整係乒乓波拍上，都幾得意。如果每枱都有個乒乓波，可以等食物時候「滴滴仔」下，重過癮。食物方面，一般茶餐廳食物都齊哂。最特別反而係飲品，有一般茶餐廳較少見既保衛爾牛肉汁、滾水蛋、黑牛。朋友叫左杯好滋補既牛肉汁，我飲左一勺，即刻想嘔，一陣雞精味，實在太補。我都係鐘意飲小朋友野，利賓納。我地叫左個咖哩牛腩一口飽。咖喱香濃，不過咖哩汁略嫌唔夠。牛腩大大件，炆得夠腍，如果有幾件牛筋既話，重好味。面包外脆內軟，不過面包上放左少少飯，反而唔太夾。尤其係我本身唔好飯，所以先叫面包既，就覺得加飯上去好怪。我好鐘意食牛利，再叫左個焗番茄牛利意紛。咸牛利好腍，味道適中，唔會過咸，不過切片稍薄，厚切返少少更佳。意粉份量適中，剛剛好，無食剩。食物上得快，又夠熱。裝修有特色，地方乾淨企理，坐得舒適，唔似得一般茶餐廳甘嘈嘈閉，又唔會一食完就不停趕你走，重要有歌聽。兩個人靜靜地食晚餐，傾下計都唔錯。