而且餐廳都幾大 枱同枱之間有一定嘅距離 唔會同隔離枱太親密！ 店員都好有禮貌同好好服務
我同中菜控嘅朋友一共嗌咗4樣野同埋每人一份甜品 包括有街邊臭豆腐 椒鹽魷魚鬚 花甲蒸水蛋 柚子骨 菠蘿皮西米焗布甸
第一樣黎到嘅係小食類嘅臭豆腐 佢嘅份量岩岩好 又唔會太大舊搞到之後食唔落 上碟熱辣辣 炸得岩岩好 唔會話炸得太耐而油益味好重 而且入面嘅豆腐仲好嫩滑
呢碟臭豆腐做頭盤小食真係好適合! 我最鐘意配埋甜醬一齊食 更佳滋味!
第二樣黎咗椒鹽魷魚鬚 我係魷魚鬚嘅fans! 我會比呢碟魷魚鬚100分!
因為佢炸粉厚薄適宜 熱辣辣 而且食得出魷魚鬚本身好新鮮彈牙 絕對好岩一班朋友一路飲住啤酒一路食嘅選擇!
之後黎咗花甲蒸水蛋 佢上枱個陣我同朋友都忍唔住即刻拎個電話出黎影張相先 哈哈 因為佢個擺盤好有氣勢
非常足料 好多花甲 花甲洗得好乾淨 一粒沙都無 而水蛋都蒸得好嫩滑 而且吸收咗花甲嘅海鮮味道 非常鮮甜 有呢個花甲蒸水蛋食兩碗飯都無難度!
最後黎嘅小菜係柚子骨 骨嘅上面係好多嘅柚子 果然真材實料唔係得個名 個醬酸酸甜甜好開胃 食落啲肉都好入味 又係送啤酒一流！
無論食中定西餐 作為女仔都會鐘意食甜品作結 今次我地每人嗌咗個菠蘿皮西米焗布甸 佢即叫即整 上枱個陣熱辣辣 又好香 我好鐘意食菠蘿皮甜甜地又好脆口 佢入面嘅西米焗布甸唔會係好甜個隻 岩晒我同朋友嘅口味
食埋個甜品就好心滿意足捧住個肚返屋企 哈哈 嗌咗total 5款食物 兩個人加埋食咗五百幾蚊黎講有咁高質嘅大排檔中菜嘅食物黎講都好合理！ 呢到仲有啲房for 一大班人 夠晒private 不過記得預先打去預約咗先! 下次等我都預約同一班朋友黎先！
