雖然地方不大，但餐桌之間的空間感足又坐得舒服，每個小擺設都見心思，無論約會定朋友聚腳都咁啱feel。晚市二人套餐$698，選擇多又夠彈性，樣樣高質，最近仲做緊85折優惠，食完大滿足！
2
Tapas（9選3）
香煎慢煮八爪魚（另加+$38）
絕對稱得上是餐廳名物，八爪魚用上三小時低溫慢煮，粗身大條嘅魚鬚咬落超柔嫩，完全唔鞋口，表面煎到微脆帶焦香。點埋特製嘅柚子胡椒牛油豆蓉，鮮甜海味即刻提昇，仲有淡淡柑橘香，食落更好味。
牛臉頰迷你漢堡
漢堡細細個但勁有驚喜！牛臉頰肉炆到軟腍入味，近乎入口即化，麵包軟熟帶牛油香。可以再加兩款酸瓜一齊食，清新爽脆中和咗肉嘅濃郁，食完一啲都唔膩，係一道好有心思嘅Fusion小品。
香煎海鱸魚
魚皮煎得金黃香脆，肉質卻保持到嫩滑緊緻，火候掌握得啱啱好。醬汁用西班牙火腿同紅咖喱調製，微辣惹味之餘帶少少酸甜，搭配幼滑南瓜蓉，平衡感做得好好。
Main (4選1）
墨汁鮑魚西班牙海鮮飯（另加+$38）
主菜揀呢個墨汁飯絕對冇錯！原隻鮑魚大大隻，爽口彈牙；飯底用墨汁同魚湯熬製，濕潤又Creamy，仲有左口魚、鮮蝦、魷魚圈同爆汁三文魚籽鋪滿面，每啖都食到多重口感同鮮味，視覺同味覺都夠晒享受。
Sweets (2選1）
煙靭之選-西班牙churro及日式蕨餅
甜品一次過滿足兩個願望！Churro熱辣辣，外脆內軟，灑滿肉桂砂糖，點濃郁朱古力醬邪惡得嚟好幸福；日式蕨餅則充滿抹茶清香，口感煙韌，淋上黑糖漿甜而不膩，中西合璧嘅配搭意外地和諧。
套餐沒有包飲品需要另外再點，我哋當然點了西班牙最具代表性的Sangria。
Still Tea Sangria $58
以芒果同熱情果調製嘅水果茶版Sangria，入口清新帶茶澀，果香自然，唔會太甜，解膩一流。
Sunset Sangria $68
以七喜做基調，氣泡清爽，加入新鮮水果調配，果味鮮明輕盈，甜度自然。
