1
首先一嚟就當然兩支啤啤佢先啦... 聽人講呢間嘢好出名，撞正我哋都好耐無食過大排檔，咁就啱喇，最後叫咗四個小菜四個人食：椒鹽骨拼酥炸大腸、小炒王、燒鵝半隻、椒鹽白飯魚、白飯，我諗都好夠。因為客唔多，所以啲嘢食好快都陸續上枱喇~~~ 首先一黎燒鵝半隻，
見到佢賣相都唔錯，已經急不及待試下，佢嘅燒鵝賣相都幾靚仔，但入口時外皮唔算脆身比較偏淋，而肉質我覺得一般未算去到好好食，可能前嗰排試過喺荃灣一間幾出名嘅燒味鋪試過佢個燒鵝，有用荔枝柴去燒，所以真係香得黎又皮脆肉嫩，不過唔緊要啦，味道都算唔錯。跟手到小炒王，
基本上每個大排檔都有佢獨特嘅小炒王，呢間嘅小炒王有韭菜花、腰果、有的菇同魚仔等等，炒得都好夠鑊氣都好好食，而且即叫即炒好夠熱，送飯一流，不過如果有大大條嘅蝦乾就更加正。之後到椒鹽骨併炸大腸，
呢個雙拼份量恰到好處，又唔會太大碟驚食唔晒，所以呢個份量啱啱好，椒鹽骨好食，都話永遠即炸即食係最香口，佢就做到呢個效果，好食!!! 不過炸大腸有少少失望，雖然炸大腸一定要食肥，但佢個脂肪比例又真係多左的，而且外皮佢未算炸得香脆，所以味道有少許失色，但都係嗰句，送酒一流呀~ 最後到椒鹽白飯魚，
份量佢都算適中，白飯魚都香口肉嫩都幾好食，不過如果要挑剔嘅話，我覺得佢啲粉漿都比較厚，但整體嚟講都係合格以上，咁當然叫呢啲餸唔少得要有幾碗白飯啦，以大排檔質素嚟講都無可挑剔㗎喇。坐到咁上下可能開始多人，所以職員都有暗示清場，咁大約坐咗兩個鐘唔夠都埋單走人，每位$200蚊都唔駛，呢次嘅用餐體驗都叫做好滿意啦。
