三記飯店

Open Now

Now Closed

呢間三記開咗好多年，聽過好多朋友介紹，但位於慈雲山，對我嚟講真係有啲遠，咁啱有朋友話帶路，於是就殺上慈雲山會一會佢，一去到就見到佢座無虛席，啲檯櫈排曬出街。先嚟一支大啤，一碟鹵水試下先，墨魚片同腎片都切得好薄，鹵水香料味重，唔會太咸，有啲鋪頭就醬油味多過鹵水味，呢間三記就唔會，非常正宗。而底下用左芽菜鋪底，吸收曬鹵水汁，好好送飯。同埋佢提供咗蒜蓉醋同甜酸醬兩種，蒜蓉醋係自家調較，好開胃。另外叫咗個蠔仔粥，蠔仔size 適中，指頭大細，唔會太大又唔會太細，有蠔仔鮮味，又有咬口，另外特別既係佢落咗土魷碎代替方魚碎，同出面既鋪頭唔同，有別樣既香味。而避風塘雞球炸得好香口，不過多咗啲油，或者係雞球會出油啦，相對之下有啲油膩感，但蒜頭同辣椒非常香口，撈飯一流。