鐵路便當 (Closed)

由佢開舖以嚟都幫襯咗幾次，由於座位有限，堂食只係試過一兩次，其餘都係外賣多。開頭感覺佢哋幾有熱誠，食物味道同食材質素都唔差，配菜又豐富，連啲餐具同包裝都有一定品質，加上好多時負責落單同收錢嗰個瘦瘦咃嘅後生仔好好禮貌，所以次次買外賣要等好耐我都會幫襯，通常都會點返佢個豬軟骨。但自從唔知幾時換咗個高高哋眼細細嘅肥仔喺門口之後，成個感覺就唔同晒。我買兩個便當叫飲品，佢一句dut埋嚟：「凍定熱呀？下次早啲講吖！」開頭我都當佢扮友善但個格配合唔到所以效果有所偏差，咁就照幫襯算。之後有個婆婆好聲好氣問佢：「XX（佢外賣號碼）仲未有嘅？」肥仔答佢：「未有咪未有囉！」我唔知佢係老細覺得自己生意做唔切所以可以咁對客人，抑或係伙記喺度幫自己老細趕客等自己做少啲，但係之前對呢間舖嘅良好感覺真係因為佢一個而蕩然無存。