餐廳只有一個full course dinner menu。
店員話因為餐廳剛剛新開張，sparkling water 或still water都係免費。除此之外，所有客人都會送上每人一杯Sparkling wine。店員仲送上兩碟小菜: 大根同海帶。等我地喺用餐過程中可以隨意去食，每道菜之間亦可清清口腔嘅味道，中和油膩感。
UNI SASHIMI TOAST
厚厚嘅鮮甜海膽加上有焦糖洋蔥，配上香脆多士。食物嘅精緻程度，作為今晚嘅第一道菜，已經足以令我地期待接落嚟嘅菜式。
第二道菜係二選一，我地今晚就一人揀左一款，咁就可以試晒兩樣。
WAGYU STEAK TARTARE
佐賀A4和牛入而混合左Wasabi同埋Pickles，面頭加左生嘅鵪鶉蛋。將佢地撈埋放上脆脆嘅多士上面食，多重口感之餘，味道真係無得頂！
MATSUBA CRAB
最底係用日本高湯整嘅啫喱，上面有松葉蟹同魚子醬。撈埋旁邊嘅蟹膏一齊食，令整體味道更豐富，更多層次。
IKURA PUDDING
店員上菜時介紹依道係餐廳招牌菜，獨特之處係Yorkshire pudding 其他地方係用鹽，但依度係用糖，外脆內煙靭 ！Pudding 裝住滿滿嘅明太子mousse，上面加埋大大粒嘅三文魚子！一啖將佢放晒入口絕對係最佳食法！大滿足😋🈵
CHARCOAL GRILL - A5 JAPAN WAGYU
見到menu 已經好期待依道菜！宮崎A5和牛，旁邊仲有日本菇同大蔥。和牛油花分布平均，入口充滿油香，軟腍鬆化！肉嘅生熟程度燒到剛剛好！
SAKE CLAYPOT RICE
用瓦煲上嘅三文魚炊飯，一打開煲蓋就聞到好香！三文魚煮到3-4熟，上檯後等客人將三文魚攪碎撈埋啲飯黎食咁就熟得剛剛好！用瓦煲上所以會有脆脆嘅飯焦，非常香口！食完個飯非常滿足！
HOJICHAMISU & YUZU PULM WINE
黎到今晚最後一道菜，就係甜品喇！依個睇落好似Tiramisu 嘅甜品，其實係用左焙茶同柚子梅酒去整。有驚喜，清新得黎又唔會太甜！伴隨住個甜品亦會有一杯同款嘅柚子梅酒可以品嘗！
非常滿足嘅一餐！坐bar檯可以睇住大廚為我地準備食物！人多想傾計嘅可以選擇餐廳另一邊嘅座位。上菜速度剛剛好，大廚仲會好細心問我哋駛唔駛抖一抖先上甜品。店員上每道菜都會詳細介紹同建議我地點樣食！👍🏻好鍾意佢地每隻碟都會有微溫，令食物出品質素不會被打折扣！抵讚！👍🏻👍🏻
