深宵食堂

Open Now

Now Closed

前晚，去開果欄買水果，買完之後順便係附近食少少嘢。油麻地旺角一帶，想搵間悠閒嘅地方慢慢食，慢慢坐，上網search 到附近有間叫「深宵食堂」，睇相見環境幾特別，就上去了。門一開，成間係日本佈置的，6點幾去到，未有太多人，落完單之後，影吓舖頭嘅擺設先，幾靚的。問店員推介咗幾款小食。甲羅燒：睇完個名唔知係乜，店員話係蟹肉蟹籽配小多士。少少咸咸地塗上多士，多士烘得脆，配搭唔錯。大阪燒：平時去日本必食，見到呢度有，試下先。細細件，上面好多木魚，味道同日本食嘅都好接近，推介!!鰻魚玉子燒：自己本身喜歡食鰻魚。一大板玉子入面，藏住一塊鰻魚，加埋上面嘅茄汁，鮮甜。蒜燒茄子：上枱時，嚇咗一跳，一整條好大呀。茄子肉上灑了七味粉同蒜蓉，好惹味，微辣，用來撈飯好正。鵝肝什菌石鍋飯：珍珠米配什菌，本來淡淡的，但重點係件鵝肝，一啖飯配一小口鵝肝，中和番個味道。總括呢度嘅食物，都幾有心思，賣相唔馬夫，碟碟都係靚靚咁上枱，配搭特別。有飽肚嘅主食，亦有佐酒小食。