睇睇餐牌都係照平常柯打兩個人份量嘅野食再一齊食，最先泥到嘅「意式鮮蝦普切塔」，雖然得幾件但賣相精緻，睇得出製作花功夫。鮮蝦夠哂大隻爽口，配合烤至酥脆嘅意式麵包，再加上特別調製嘅茴香蓉，及旁點綴嘅露荀與蒔蘿，不論口感再到味道都配合得一流，唔錯。
其後到嘅係「炸魷魚」，只睇菜單上名字並唔特出，但結果食物水準確實予人意想不到嘅驚喜，除咗魷魚炸嘅熟透度剛剛好，所以肉質嫩且容易嚼，至於味道方面炸魷魚本身已經調配得十分夠味，但個人極推薦點蘸佢自家制「青檸蛋黃醬」。加入青檸後嘅蛋黃醬，變得無咁溜同油，整體變得更清新，同炸魷魚相當夾。另外，如喜歡青辣椒仲可以一齊咁食，帶少少辣但多一份味道層次同口感。
最後到嘅係「炭爐烤澳洲穀飼安格斯肉眼扒」，先講廚司烤功好，肉眼扒除咗烤得靚之餘，唔會過熟或太生，肉質夠林唔老； 香味方而，由於炭爐燒帶陣陣炭燒香味；入口牛肉味濃，但混合埋車厘茄阿根廷青醬一齊食，調味除咗咸仲有些少酸，絕對大大提升咗食慾，醬料助功表現出色！
總結呢間餐廳位於銅鑼灣區價錢相宜，食物水準不俗。個人覺得最大賣點可以話係食物配搭，以及醬料調味混合得宜，令到味道更加突出，提升食慾。整體表現唔錯，值得推介。
