雋園火鍋

Open Now

Now Closed

好耐冇去過，聽朋友話換咗新廚同Menu，決定同屋企一行六人去試下。環境依舊，乾淨，坐得舒服。原來新Menu都未印好，叫老闆介紹拿手小菜。哈哈，超好彩，老闆話一星期先有一次貨嘅魚扣有得食。刁咀嘅我哋聽到仲要係避風塘式未試過，梗要食啦。果然不負眾望，正！👍記住訂位預訂睇下有冇貨！仲有好少地方有得食嘅焗魚腸，同平時有小小唔同，係冇咁乾，所以啲蛋仲好滑。唯一係入面多咗啲肉絲有啲格格不入。飄香鷄係我近期食過最有驚喜嘅粵菜雞。聽聞師傅仲有隻片皮雞，下次一定要試下！以為上湯菜冇特別，原來係叫米水菜心，實質好似粥底咁，我哋差不多飲晒啲湯！仲有個麻辣桂魚，火鍋上，唔太麻，啱啱好。可惜美中不足係冇乜甜品。咁嘅質素粵菜同環境，晚飯埋單每位$230，都好合理，難得見到有用心嘅食店。