魚滑粥粉麵茶餐廳 (Closed)

依度係我常幫親既舖頭，因食物質數唔錯，特別係粥同柱侯牛腩，煲仔飯都幾好 ~咸魚肉片排骨煲仔飯，係霉香咸魚，撈飯一流，肉片爽滑入味，只係排骨經常過肥多骨唔夠軟滑。一向都只係煲約十五分鐘，飯會略濕。我間中有時間都會要求煲夠三十分鐘，咁樣飯就夠乾身又更香口﹗味道係中上級，當然要睇叫咩配料啦 ~ 係大埔食煲仔飯我首選係潮洲小炒 ~柱侯牛腩撈麵，近來啲牛腩越來越瘦，雖然味道暫未走樣，仍然係好味既，但係口感同質量明顯比以前差左。柱侯牛腩粗麵，係大埔黎講依度既牛腩係我最愛，非常香濃既腩汁，每次都忍唔住要勁飲湯，正﹗牛腩肉質軟滑，但有時都會有瘦肉，鞋鞋地，不過味道不變。粗麵爽滑彈牙，完全唔好煮過龍，林碧碧。暫時全港我最愛既柱候牛腩始終都係旺角某間老店﹗