Barg (Closed)

今日去食呢一間意大利餐廳都非常之有情調，我覺得同朋友嚟一齊傾吓計食飯都幾啱。頭盤嘅麵包幾鬆軟，加埋少少橄欖油令人食指大動之後我哋叫咗一個白酒煮大蜆，呢一個大蜆真係好大好厚肉；亦都非常之鮮甜，好好食。加埋可以點用啲麵包黎點汁食，非常之唔錯。因為我老婆唔食牛，所以我嗌左一個芝士肉丸。呢個芝士肉丸係用豬肉加雞肉，食落去幾爽口又唔柴，加埋芝士亦都非常之濃郁，好惹味！我點左個main course就係羊架，佢係上菜之後呢會用火槍燒一燒，令到個表皮更脆更香口。食落去肉質好嫩滑同埋亦好juicy。餐飯我最鍾意嘅係呢個羊架！呢間餐廳無論餸菜同環境我都非常之滿意，會介紹多啲朋友嚟食。