Lucky Smash (Closed)

情人節嘅夜晚冇咩節目，都係係荃灣手拖手行街街。正苦惱晚餐食咩嘅時候（外賣要搵地方食），呢間係荃灣新開嘅漢堡包店轉嚟陣陣嘅芝士同漢堡扒嘅香味，見門口都幾多人等緊拎外賣。作為一個外賣嘅選擇，漢堡包的確係幾適合，應該值得一試，於是就二話不說一人一個餐。兩個包基本上都冇分別，只係一個雙層一個普通版，都係牛肉同芝士，大食嘅我要食雙層先夠。先講個包，佢地嘅牛肉比較結實，係有嚼勁嗰種，配搭住有啲鹹味嘅芝士，都幾惹味，不過如果可以多啲其他配料包括例如洋蔥生菜番茄會開心好多。薯條係我鍾意嘅幼身薯條，因為我鍾意薯條外皮嘅香口，呢種就啱我心水，份量好夠。食完可以摸著肚皮繼續手拖手去海濱甜蜜下，消化下呢一餐咁飽肚嘅情人節晚餐。