呢一間正一冰室都可以係一個例子，因為佢既出現，確實比左街坊有更多既選擇，唔好睇佢係市場入面，環境都真係舒適又企理架
晚市除左晚市套餐之外，重有一大本餐牌，大部都係小菜為主，選擇真係多到你唔信，要係入面揀心儀果款食物，都真係有D難度，因為樣樣都想食 !
今晚我就同一位同係住係附近既朋友黎食飯，叫左幾個小菜SHARE食，先黎既有每人一碗中湯，味道都幾好，感覺無味精，比較淡身少少及本身湯料既份量多，所以味道都味道清甜，可以邊飲邊等D小菜黎
呢度咁就為之一SET，一個人食絕對夠飽啦 !
第一個小菜係馬拉盞炒時菜 $75，咁當然我就揀左炒通菜啦，份量都幾多，味道唔錯，雖然係馬拉盞，不過味道唔太辣，適合大人細路食，炒得夠鑊氣及仍可保持水份唔乾身，所以都唔錯，係一個比較大眾化既蔬菜選擇
第二個係比較香口既小菜，椒鹽豬扒 $75，賣相唔錯，顏色都炸得好鮮艷，相當吸引
近少少睇就可以睇到豬扒炸得都幾乾身，意思係唔太油膩，但食落個口感係除左味道夠重夠香口之外，豬扒既肉質唔乾唔韌，基本上每件都有連小骨，所以食落既味道更香，呢個都係我推介比大家既菜式，因為真係做得唔錯
呢個係當晚既晚餐套餐之一，咕嚕肉 $78，而晚餐套餐既供應時間由 5:30 - 11:00 PM，所以供應時間都幾長既
呢碟咕嚕肉既賣相都同樣吸引，可以妣媄一d大酒樓既質素，佢既酸甜味道剛好，醬汁份量適中，完全掛上每粒咕嚕肉身上，外層炸粉唔厚，入面既肉質亦唔會韌/硬，係做得唔錯既 ! 呢個咕嚕肉，同行既友人都覺得幾出色
最後重有呢個朋友介紹既皇牌咖哩牛腩 $98，呢個係屬於散叫既小菜之一，用煲仔煮成既咖哩牛腩 ，味道特別香，上枱時仍然保持強勁既熱力 ! 所以令每件牛腩都仍然肉質鬆法
多件既咖哩牛腩都係大大件 ! 同比時食既咖哩牛腩有少少分別，同時佢呢個咖哩味道都比較濃厚，帶點微辣，所以用黎佐飯一齊食，係唔錯既選擇
總結係今晚所揀既4款小菜都唔錯，不論賣相到味道，性價比都幾高，雖然整體價錢而言可能高左小小，不過係呢一區黎講，除左酒樓，都比較少有咁既質素了，所以真係不妨試試
