大虎蝦一上鐵板就已經聞到鮮香，師傅煎蝦煮蝦汁煮到濃厚稠身，蝦肉爽口彈牙，蝦頭蝦尾燒到脆身，食落好有層次感。跟住有鮮活日本帆立貝，睇住師傅即席鐵板烹調，帆立貝肉質爽滑，仲有炒雜菜解膩，味道清爽。
主菜鹿兒島黑毛豬肩，肥瘦相間，事前已經過低溫慢煮，所以肉味濃厚但不膩；炒飯帶微微鐵板焦香，粒粒分明。茶碗蒸加入魚子、鰹魚汁同木耳絲，好滑好鮮，味道層次分明。味噌湯鹹淡拿捏得好，而家冬天飲夠哂暖胃。最後甜品係抹茶大福，外皮煙韌、內餡充滿抹茶香，好適合劃上句號。
食整個套餐既過程，感受到師傅嘅手藝同用心，食材新鮮，每樣都係即燒即食，保留食物原味。坐喺鐵板枱前望住即席烹調，睇、聽、聞、食都有層次，好似欣賞一場料理show咁。份量啱啱好，可以食晒唔會太飽但又非常滿足，服務亦到位。
