大概七點左右入座，好彩一早打嚟預約，因為已經全場坐滿客人。呢到環境光猛，坐得舒適。
每張枱上面放置左佢哋秘製嘅醬汁，有越北是拉差醬，河內沙嗲XO醬同埋越式海鮮醬，好吸引。呢度用半自助形式，可以自己去斟水。
我同朋友各點左一個粉麵，店員隨即每人派咗啲芽菜同香葉，而每張枱都有辣椒，適合唔同人嘅口味。
手作扎肉米紙卷 4件 $32由於想食得健康啲，特登揀咗個清淡啲嘅米紙卷，扎肉好食，而且可以食多啲蔬菜，推介。
意大利黑醋汁蒜蓉牛油雞翼（5件）$38呢個雞翼非常有驚喜，冇諗過外皮可以揸得咁香脆，牛油味同蒜蓉味加埋非常香口，入邊雞肉仍然保留嫩滑多汁，食唔停口。
凍檸茶$16 荔枝紅茶 $19本身諗住聯點一個飲品，冇諗過荔枝紅茶竟然有果肉，入口淡淡荔枝香，唔會太甜之餘仲有大大粒果肉咬，下次會再飲。
火五生牛肉粉 $42朋友食嘅生牛肉粉，呢個價錢冇諗過份量咁多，連生牛肉嘅份量都好多，湯底香濃，生牛肉嫩滑而且冇筋，再重口味啲嘅朋友可以自己加啲醬汁，好抵食。
越式老火花膠雞湯河$56本身想食魚翅嗰款湯河，但係今日已經賣晒，所以嗌左花膠雞湯，估唔到都有四五舊花膠，認為足料而且花膠一啲都唔聲，有少少媽媽煲花膠湯嘅感覺，雞肉入口滑，而且大大嚿，呢個價錢真係唔知點樣做到，唔怪得知咁多人嚟食。
同朋友兩個人亂嗌，每人都只係$100 ，非常抵食啊，而且坐得舒服，店員完全冇趕我哋走，絕對要再嚟！
