餐牌第一頁就係炸雞同拉麪，似乎係佢地嘅招牌，咁當然要試下。落單後，等咗大概5-10分鐘左右就有得食啦!
東京風黑蒜由醬油拉麵 $58
黑蒜油拉麪湯底相對其他店，甚至出前一丁嘅黑蒜油黎講，味道較淡一d，反而覺得無咁鹹嘅呢個拉麪更好食。配料方面有爽脆木耳絲同粟米👍🏻叉燒係薄片嘅，食落都軟冧。配半顆溏心蛋，質感幾好，蛋白仲有少少稀黏稠狀。
炸雞黑豚肉咖喱海軍飯 $58
而炸雞黑豚肉咖喱海軍飯都好好食，有薯仔洋蔥紅蘿蔔，大細份量剛好，好足料拌飯。炸雞意料之外好食，唔會覺得好熱氣嘅炸雞，因為佢嘅外皮唔會好厚炸漿，而入面雞肉嫩滑，外脆內軟～呢個飯升級咗泡菜同凍檸茶，都只係+$10，超級抵食! 如果泡菜份量可以再多d可以拌飯就完美啦。
溫泉蛋北海道忌廉芝士天使麵 $48
因為抵食第二日又再食，今次點咗芝士天使麵，估唔到日式餐廳都食到天使麵。上碟嘅時候見到以為都唔係好多，點知食落原來份量都唔少喎。有流心蛋係麵，再撈埋芝士白汁，亦有蘿蔔薯仔做配菜。只係呢個真係要趁熱食先得，唔係會硬曬。
總體黎講，呢個價錢有咁多選擇，升級套餐都只係$10就有凍檸茶同小菜，晚市黎講算幾抵! 呢排去，用消費卷買滿$100 仲送餃子 x 2，有機會會再試😋
