夏天當然就要食撈檬，今次叫咗炸豬肉春卷扎肉撈檬同豬頸肉撈檬，兩個都唔差，夏天食真係好開胃！炸豬肉春卷炸得超脆口，裏面有唔少豬肉碎，味道都幾有當地風味。而佢哋嘅鹹檸豬頸肉充滿着油脂，調味剛好，食落亦唔會太乾～
嘢飲方面，試咗佢哋嘅蛋咖啡，當然冇得同河內嘅嗰間老店比較，但佢嘅蛋咖啡絕對唔差。面層嘅蛋奶泡綿滑，而且似足越南嘅咖啡，夠甜！絕對係可以令你回味一下越南蛋咖啡嘅選擇！
其實今次我哋仲嗌咗其他小食，例如串燒、炸雞翼、shake shake 雞軟骨，普遍嚟講佢哋嘅小食都幾出色！朋友亦都嗌咗佢哋嘅金邊粉，但佢就話比較普通🥲
四個人，一人一個粉麵，三杯嘢飲，加埋咁多小食，人均都只係$150，而且食物有相當質素，真係幾推介～
