我地一家三口，叫左兩道菜式，其中一道就加$22升級做套餐，包括有是日餐湯+前菜+飲品，另外再追加吉列炸蝦（我個女話想食蝦，所以特別追加俾佢
）等左一陣，好快就上咗個餐湯同前菜
個湯估計係南瓜忌廉湯，味道尚可啦，有別一般南瓜湯，南瓜味唔太重，飲到最後就覺得有啲太鹹，鹹到喉嚨有些少唔太舒服，但又唔算太嚴重嘅。至於前菜，味道不過不失，雖然醃製過，但又唔會太鹹，口感爽脆，我個女就幾中意啲紅蘿蔔嘅。
第一道菜式：Ado's 自家手打日式漢堡排 （此道菜式會跟隨白飯奉上）
擺盤唔錯，好有日式西餐feel，但我第一睇見到嘅感覺就係份量有啲細，同埋啲醬汁就俾得有啲小氣，個伴菜沙律啲沙律醬真係小得有啲可憐
至於主菜漢堡排都俾我預期中細件，味道係ok嘅，但未至於好突出。第二道菜式： 蛋包飯
蛋包飯個蛋都做到流心嘅效果，飯亦都做到日式蛋包飯嘅味道，但醬汁方面都唔多夠囉，由於之前都食過日本出名嘅蛋包飯，人哋啲醬汁真係多到滿瀉，所以就對哩個蛋包飯有啲失望囉
至於追加嘅炸蝦都係不過不失，冇咩特別，但追加一隻都要$18，如果唔係我個女想食，我真係未必會叫。
總括嚟講，味道未算突出，份量黎講，相信一般女仔應該係足夠嘅，但男士就可能只夠頂到肚餓，未至於係食到飽。我同我老公都一致認為醬汁方面真係可以慷慨啲，俾多少少囉。
真心覺得，如果佢想係大圍嘅食店突圍而出，相信要係味道同菜式上要花多啲心思。
