煊記

Open Now

Now Closed

去聖約翰總部上急救班，響正呢個山旮旯嘅地方，晏晝食飯確是一個問題。幸好有同學指點，可以行返落去堅尼地道買飯盒，已經唔在意好唔好食，姑且一試。小店極唔起眼，好容易行過咗都唔知。店舖雖小，但飯盒種類都唔少，都有大約10個飯畀客人揀。買咗個「咖喱牛腩飯」 ，唔係快餐店啲啲稠撻撻黃琴琴嘅汁，而係用印尼咖喱，有種清香味道。牛腩炆得夠焾，連薯仔都入味，因為佢哋唔會好似出面啲餐廳切得好大件，於是啲味就入哂牛腩同薯仔度。再望隔離兩個同學仔個飯，賣相都唔錯，佢哋都話好好食。最值得一讚嘅係，食咗個飯盒之後，去到下晝都唔口渴，無話要成日飲水。下次再嚟恐怕都係三年後，但絕對推介畀所有要去聖約翰總部上堂而要晏晝搵食嘅同學仔。P.S.：收錢嘅婆婆都好好。