雖然係週日晚上，但客人唔多，店員招待都細心有禮，不時換上乾淨嘅碗碟，食物方面都頗有水準，而且價錢合理，可以一試，新張期間仲有啲菜式有優惠價
餐牌供應泰越菜式，選擇豐富，有小食、串燒、沙律、湯品、海鮮、咖喱、主食、蔬菜、粉麵飯、甜品，亦都有啲比較特別嘅融合菜式，例如蝦球伴鵝肝、慢火灼魷魚等。一律散叫，如果日後供應多人套餐，省卻點菜嘅煩惱，又更為划算呢
泰越拼盤 $128
一行四人決定點個拼盤，唔洗煩，試到多啲款式。拼盤有一口春卷、扎肉炸蝦片、香茅單骨雞翼、手打蝦餅四款，即時製作，新鮮熱辣
蝦餅表面炸至香脆，肉質彈牙；一口春卷酥脆唔油膩；單骨雞翼入味肉嫩；扎肉炸蝦片都係常見菜式，唯一挑剔係醬料盤太窄，唔能夠成塊蝦片浸到酸辣汁。
慢火灼原隻魷魚 $88（原價$128）
原隻魷魚有兩款煮法，可炭火燒或慢火灼，因為後者有新張優惠價，一於試下。魷魚原隻上，簡單加有青紅辣椒、蔥花調味，配上芥茉豉油。
魷魚十分嫩滑，而且爽口，烹煮時間剛好，冇加入繁複嘅調味令魷魚嘅鮮味更為突出，沾少少芥茉食已經簡單美味
但如果可以配個泰式生蝦汁俾我就更加正，更為惹味。
咖喱皇金瓜海蝦 $188
實物比圖片更多咖喱汁，我地幾個唔太肚餓，否則應該點個飯撈汁，咖喱調整至適合香港人口味，濃淡得宜，而且唔辣，容易入口。
海蝦一共六大隻，非常新鮮，肉質爽口，裡面仲有唔少入味嘅金瓜
西貢路邊燒春雞 $108/隻
即時製作，所以燒春雞接近最後先上枱，但一行四人都覺得春雞值得一試
上碟前已經分好四份，方便食用。燒雞皮香脆唔油膩，雞肉十分嫩滑，加入香料燒過，味道獨特，唧少少青檸汁，味道更加突出。
馬拉盞炒椰菜苗 $88
每次食泰國菜幾乎必點椰菜苗，輕輕加少少辣椒、蒜蓉去炒已經好入味。椰菜苗鮮嫩，完全唔會有苦澀味，食落爽脆，有豐富鉀質，有助消化。
飲品方面，選擇多元，有鮮果汁、沙冰、朱古力、咖啡。追求健康嘅朋友可以點鮮榨果汁，提供多款配搭，例如牛油果乳酪、西柚、青瓜、水蜜桃、奇異果等。至於我就推薦原個菠蘿沙冰，夠哂清甜。
餐牌：
