今晚想食啲地方菜，朋友就推薦依間「京滬佳餚」雲吞鴨肉湯 & 花膠黃魚羹
本來我自己叫咗個鴨肉湯，但係見老公既羹都好吸引，所以飲咗啖
超鮮甜嘅魚肉味，加上有好多菜又有花膠，養顏又健康，當然個鴨肉湯都唔輸蝕，鴨嘅香味係個湯度都飲到出嚟，兩個湯都好高質
京滬擔擔麵
呢款係我最鍾意食嘅麵類菜式，每次見到都一定要order， 依間嘅擔擔麵 麵質好煙韌，湯底比起辣，麻嘅感覺會更加重，但係酸 麻 辣三款味都配合得啱啱好
小籠包六件
個小籠包不得了，齋睇相都知道裏面湯汁多到就快噴出嚟，湯汁鮮甜 肉質嫩口 皮薄餡靚，雖然塊皮薄，但係食咗咁多粒都冇一粒夾起就爛
讚
楊枝沙律蝦球
呢個比起一道主菜更加似開胃沙律菜，主角蝦球超大件，共五件，炸好既蝦球再加上酸酸甜甜嘅醬汁，十分開胃，蝦肉新鮮爽甜，旁邊仲有好多沙律菜 藍莓 士多啤梨 柚子 賣相已經好吸引，味道更上一層樓
京滬酥香烤鴨(半例)
之後就到呢間餐廳嘅招牌菜，喺餐廳門口入去就已經可以望到一個又大又乾淨嘅廚房，喺水吧前面有幾個大烤櫃 裏面掛住一隻隻嘅鴨，啲烤鴨係喺依度整，新鮮熱辣出爐，所以至可以令到質素咁好
烤鴨固然係主角，但係用黎包住佢嘅薄皮 亦都唔可以睇小， 出面食嘅多數既薄皮同皮中間好容易黐埋咗一齊， 食起上嚟有啲狼狽，但係呢度嘅薄皮會一層皮一層牛油紙分開，省卻咗食客遇到既麻煩
烤鴨超香唔會肥，加上醬汁青瓜等配料 連埋薄皮包住一齊食，食完之後個口會留有肉汁既香味，我諗呢個就係佢可以成為招牌菜既秘訣，將所有材料分開食 唔會有咁嘅香味，但係將所有材料夾埋一齊，食完之後個口個陣香味，會令你忍唔住再食多幾舊，但都唔會覺得膩
呢一餐真係超滿足，好耐冇食過咁高質嘅地方菜，而且座位 環境 裝修都令到食客好舒服，下次再encore試下其他菜式
