放食物位置就係入口旁邊, 比其他酒店集中, 好快就行完一圈, 感覺上款式唔多。
一開始就食最鍾意既海鮮, 非常豐富:
- 長蟹腳 (小妹超鍾意食), size 中等, 味道ok, 海水味唔算好重, 食左一碟, 去再攞, 發現無左, 問吓個職員, 佢就話今日返貨好少, 攞左碟係d人頭先夾淨比我夾, 得好少同比較削, 但我都攞左一碟
- 澳洲生蠔, size 好細, 唔算肥美, 但味道鮮甜, 職員不停即場開, 有好幾款醬汁選擇, 一向對生蠔麻麻地, 都食左5隻
- 凍蟹有兩種, 一種size比較大同蟹腳有毛, 有膏, 好多肉; 另一種細隻d, 肉較少, 但同樣鮮甜
-琵琶蝦, 已切開一半, 用叉一”吉”就起晒肉, 好爽, 但咪道較淡
- 仲有蝦, 青口, 同埋螺
朋友話以前有龍蝦食, 但而家唔見, 可能因為通脹, d野都貴晒, 所以無得食卦
食食吓, 突然見到有個waiter 捧住2 隻碟, 共有4隻龍蝦, 比隔離張枱, 我地好出奇
, 朋友問waiter係咪d客另外order, waiter就話”幫我地跟跟”, 我地都唔明要跟d咩? 過一陣, 個waiter 就攞左 4隻龍蝦比我地! 正呀! 隻隻大過我手掌! 有d仲有膏。原來要問先有!
食完海鮮, 都飽左一半, 再黎刺身, 有三文魚, 吞拿魚, 赤貝, 北寄貝, 另外有鰻魚壽司同卷物, 仲有冷面。質素ok!
再睇吓有咩食先, 有salad吧, 2 款湯, 試左冬蔭公, 好香, 好飲wor! 另外有芝士, 巴拿馬火腿, 生果等
熟食, 選擇比較少, 炸蝦仁, 班球, 花膠 (放得後排好邊, 差d miss 左! 好食! ), 烤牛肉 (得一款, 即切), 有片皮鴨 (用黎包住鴨既皮好厚好乾, 似放左好耐, 唔好食), 上湯煮芥菜, 蒸豆腐, 咖喱, 即烹粉面。 食左好少, 因要留肚食甜品。
甜品好靚, 都幾多款, 士多啤梨拿破倫超好食! 拿破倫餅好脆, 吉士好多好好味! 朱古力蛋糕同白朱古力蛋糕都好好食, 朱古力好香好滑, 而白朱古力蛋糕較甜, 比人好sweet 既感覺! 好好味! 開心果朱古力蛋糕都好好食! 仲有芝士蛋糕 (係焗嗰種, 芝士味好重但偏咸), 低糖芝士蛋糕 (質地鬆軟, 有少少似梳乎喱), 檸檬批, 蘋果批 (好多蘋果好足料) , Tiramisu (普通, 無層次感, 食唔到酒味), 杏仁糊, 即整pancake, 同4款雪糕.
而家d buffet 愈黎愈貴, 今次用HSBC platinum card 有20% off, 連加一每人$374
