一線之緣 (Closed)

旺角西洋菜街近始創中心果邊，越開越多間食肆。短短數百米，已經有上四五間米線。競爭如此激烈，食物水準亦都相對提高。一個人返工前簡單食個午餐，經過呢間一線之緣，個名幾特別。店內滿座，外面都有人群買外賣，就入黎食下新野。餐牌上樣樣食物都好吸引，奈何一個人又食唔到咁多野，最終決定叫一碗清湯米線($30)，再叫其他配料。米線本身有肉燥、芽菜，最開心係有鮮腐竹，唔洗加錢點。安格斯牛頸脊($12)賣相討好，忍唔住要叫。另外仲揀左鮮牛味牛筋丸($8)同魚腐($8)。三樣餸菜都各有驚喜，牛筋丸更加係必食推介！牛筋丸果然如其名，充滿鮮牛味，十分有咬口。咬落爽口彈牙，同加左麵粉果啲好大分別，味道濃郁。魚腐吸收左湯汁，香口嫩滑。安格斯牛頸脊，比肥牛更加有咬勁，更濃牛肉味。米線屬於比較硬身爽口，湯底第一啖飲落無乜特別，不過將肉燥撈均後，味道就剛剛好。問侍應姐姐拎左餐廳自家裝辣醬，輕輕落左兩茶匙，已經足夠提味，又唔會太辣。除左米線之外，仲有多款食物選擇。尤其係各款小食，見到隔離每一枱都有食，感覺吸引。全部都不過係十幾廿蚊，值得encore再試下。