甘味讚岐手打烏冬 (Closed)

今日喺小西灣附近探完朋友之後喺藍灣廣場搵間餐廳食個tea先。難得呢度有我好鍾意食烏冬🍜，梗係揀佢啦，甘味~麵豉燒雞扒蕃茄烏冬🍜🍅：以前都食過甘味嘅蕃茄湯烏冬，好耐無幫襯，但依然保持水準。未食已經見到個湯好濃，唔係好似出面食嗰啲好稀，蕃茄湯呈橙紅色，非常吸引，湯底夠濃，用料十足，啖啖蕃茄蓉🍅🍅🍅，齋係蕃茄湯撈烏冬已經好好味，食完配烏冬都忍唔住飲晒成個湯，真係好好味！而烏冬係讚岐嘅手打烏冬，吸收晒蕃茄湯嘅精華，非常入味，烏冬呈半透明狀，有嚼勁同埋靭度十足。燒雞扒另上，能保持皮脆肉嫩，十分香口，而且夠厚身，份量十足，令人食指大動。小食唐揚墨魚咀：炸到金黃香脆，口感煙韌又爽口，炸粉又唔會過厚，唧少少檸檬汁🍋更加美味！藍碟花百香果梳打🍹：乃人氣飲品，冰凍嘅飲品，飲完成個都冰涼舒暢。藍碟花仲好健康添，有助增強免疫力、促進皮膚健康，又可以舒緩壓力同埋保護眼睛🤩。除左烏冬，呢度仲有鍋物🥘、刺身、串燒🍢，下次要再嚟試下先😋