芝樂坊餐廳

Cheesecake Factory真係好適合一大班親友黎食飯，呢度D食物又好味又大份。我地坐低冇耐，侍應就會比一籃餐包包括黑糖麵包同原味麵包。個人就比較喜歡黑糖麵包，外脆內軟，而且有好香既黑糖味。每次都至少會添一次。每次都必定會叫《SHEILA'S 茜拉雞肉牛油果沙律》同《芝樂坊粟米片》。《SHEILA'S 茜拉雞肉牛油果沙律》有好多料包括烤雞肉、鮮牛油果、沙律菜同腰果等等。呢個沙律用上柑橘蜜糖花生油醋汁，食起上黎會甜甜地好香口。另外，沙律上面鋪滿既墨西哥粟米餅條更係提升整個沙律既口感。《芝樂坊粟米片》，係一大碟墨西哥粟米片上面鋪上一層厚厚芝士，有D青辣椒同蔥。另外配上牛油果醬、墨西哥番茄辣醬同酸忌廉。粟米片好香脆，仲可以每次用唔同既醬一齊食，食到好多唔同配搭。我地都叫左《菠菜蘑菇意式烤餅》。其實食左上面兩碟都已經飽飽地，好在呢個烤餅份量唔大，我地最終都食得晒。