薑蔥魚春拼魚卜
一上枱已經香到不得了！薑蔥味好濃，魚春同魚卜都炆得好入味，用黎送飯一流。順帶一提，呢度嘅飯好大碗(食得太興奮唔記得影相)。另外，魚卜完全零腥味，因為廚師將魚卜切到勁細粒，完全被薑蔥汁攻陷。魚春就唔洗多講了，薑蔥炆魚春一向都係冇得輸。
麻辣田雞煲
因為我食辣唔太叻，所以嗌左小小辣。田雞都幾大隻，煮得好滑，麻香同辣香滲透肉嘅深層，連骨都”損”埋。除了田雞，煲內仲有青瓜，食食下濃味野可以清一清味蕾。小小辣啱啱好啱我餵口，一開始唔會太辣，之後愈煲愈辣，辣得好過癮！
蒜茸炒萵荀絲
蒜茸炒萵荀絲比我想像中濃味同大碟，我十分喜歡，因為清淡有益得黎又唔會冇味。整個小山丘的萵荀絲眨下眼就俾我地清唒。
西瓜鮮奶
西瓜鮮奶超級鮮甜，飲得出西瓜同牛奶都係好新鮮的！又解渴又解辣，正！
高力豆沙
高力豆沙十分有驚喜！蛋香十足，蛋白彈牙，甜度拿捏得啱啱好，最緊要係夠熱！
小甜甜除左食物有水準外，員工態度都十分友好。食完呢餐之後，我已經將佢列入左頭10大最喜愛餐廳之一，以後會經常光顧。
