啡奴 (Closed)

幾年前喺觀塘返工，飲過 Coffee Slave 嘅咖啡，印象頗深；早前知道荃灣開咗分店，頂左 Beans 以前個位，於是趁入荃灣時順道嚟朝聖一下。以前 Beans 「在生」時，呢度好墟冚，估唔到而家頗為冷清，晚飯時間居然直入唔使等位😐。點好菜，先嚟餐湯，係久違了嘅雜菜湯，Cafe 嚟講比較少見，味道正常。主菜揀咗啡奴自家製龍蝦汁帶子意大利飯同紅酒牛面肉燉什菜配包條，前者面頭鋪咗食用花，賣相幾靚，飯粒雖然唔算飽滿有啲碎濕濕，不過龍蝦汁味道都幾出，整體唔錯；後者味道近似炆牛肋條，肉質夠軟腍，醬汁入面有蘑菇，薯粒同甘筍，其中甘筍味最突出，可惜麵包條少咗啲，好快就食哂😹。套餐加 $25 配杯抹茶牛奶，size 比想像中細，只有茶樓茶杯咁上下大🥺，不過質素係好嘅，抹茶味夠濃，奶亦打得厚身幼滑。