今次又比我搵到平靚正日式料理
餐廳燈光偏柔和 今次仲安排我地坐梳化位 舒舒服服咁食
先點個味醂魚乾($38) 魚乾煙煙韌韌 好有咬口
自有鮮甜 點埋沙律醬 作為開胃小食值💯
再食多個小食 芝士明太子蛋卷($38) 總共三件
蛋卷厚實 內層鬆軟 入口食到雞蛋 明太子 芝士三重口感
明太子鹹香微辣 芝士溶化 隨時食出拉絲效果
冷盤揀咗牛肉他他燒($88) 真係連冰粒上
保持新鮮度及冰冷感 雪花紋薄切牛片呈嫩紅色
中間全生狀態 邊位可見輕燒過 同時享受生與熟味道
卷埋香蔥及蘿蔔泥食 更突顯牛味濃郁
胡麻汁牛肩胛($68) 個人認為呢款係必點
店員先為我地set爐並加上少量油 全程自助燒肉 幾成熟自己話事 有得玩又有得食
牛肩胛肉質爽彈嫩口 夾雜有嚼勁嘅牛筋
油花香而不滯 燒至五成熟再配合胡麻汁 簡直一流
飲品都非常有特色 藍桔富士山($35) 打卡精選
藍白色調 以富士山造型登場 上層係冰凍雲呢嗱雪糕
藍色係大人細路都鍾意嘅波子汽水 味道上唔算太甜
加入Led冰粒 成杯野飲閃閃發光 絕對相機食先
至於焦糖鮮奶($36) 都無令我失望 以朱古力畫花
焦糖香氣撲鼻 雪白牛奶滑溜香甜 兩者結合將濃香大幅提升
飲完唔會甜到起痰 反而有種暖笠笠嘅舒暢感
我已經bookmark咗呢間餐廳 仲介紹埋朋友
從此佢唔再隱世
