華順越南餐廳 (Closed)

華順位於一條小後巷，一定係街坊致識嚟，而我嘅第一次亦都係住附近嘅友人帶我嚟。後巷好處與壞處：有啲食客係外面食煙，你係煙民就係好處，對我嚟講就係壞處。而裡面環境就一般，茶餐廳咁。都唔記得有無寫過華順食評。我平時會叫生牛河，上枱時啲牛肉仲係有少少生，係用湯浸熟，軟靭適中，唔多肥膏，啲香葉都新鮮。致於個湯底，我覺得同其他舖頭食到果種味唔一樣，又唔會覺得佢特別難食，或特別好食，但就有一種屋企人煮比你食嘅感覺。不過，我今餐其實點咗一碗漁村湯檬曉($48)：聽聞檬曉係越南話發音檬粉，不過，今晚檬粉賣哂，所以我呢碗係河粉。個橙色湯係有少少酸酸地，味道幾特別，又好醒胃。舊蕃茄就好普通，不過四十八唔係諗住佢有機蕃茄掛？肉碎唔多肥膏，好啱懶人食。據聞老闆娘係越南人，可能呢啲就係佢屋企嘅味道，同出面唔同。