波尾雞是日本名產，飼養過程無打肥仔快大針，無求証虛實，但都覺得食得好安落。 而呢隻雞翼真如朋友所講，十分有雞味，肉質好彈呀！不得了，叫左兩轉！強推！
另一款心水係燒帶子，好鮮味應該係鮮帶子，唔係雪藏帶子，好感動呀！！成粒放入口，淡淡既海水同美奶滋醬完美結合！好日式既味道！
燒雞皮好爽脆，唔油膩，唔太咸，好岩我食。 如果你鐘意食雞軟骨，建議你叫雞皮，因為呢度啲雞軟骨好瘦，真係軟骨，唔會有少少油既口感架。
蘆筍豬肉串又係另一個必食之選，豬肉燒得好脆，蘆筍好新鮮！我平日鐘意食爽口野多啲，呢串真係好得我心。
最後，必點係和牛串，個汁係有啲濃，但夾埋牛肉一齊就岩岩好。牛肉包住既唔知係咩，軟林林似係芝士，但又無芝士味，到底係咩我都無理，總之好食！
我地仲叫左枝清酒叫一品，忘記左影相，係店長推介。 果然係溫醇易入口，甜糯的味道。
其實我地仲叫左鰻魚爐端同白燒兩款，不過我就一般鰻魚，鐘意白鱔爽口啲，可惜呢度無白鱔。另外又叫左蕃茄豬肉卷，都好食不過唔係特別突出就唔多講啦。蕃薯南瓜天婦羅呢，個南瓜係粉個種，我又麻麻地，我鐘意爽甜，所以都唔特別推介。明太子豬肉卷爽左片香葉堪稱敗筆，明太子同香葉兩樣濃味撞到應，兩邊都食唔到真味，可能要轉一轉個組合啦。
講講背景音樂，真係好有心思，係三味線音樂，好古典，好有日本風味，悠閒既感覺！good pick ar sound director!
總括黎講，呢餐好滿意，會再來唷~
