丼丼屋 (青衣城1) (Closed)

之前都食過幾次丼丼屋，服務不錯，唯食物等候時間不算很快。今次我地兩個人總共叫左4樣野，分別係芝士薯餅、芝麻雞翼、牛肉石頭鍋及滑蛋豬扒定食。芝士薯餅及芝麻雞翼都係我最愛嘅小食，芝士薯餅入面嘅芝士真係超邪惡，雖然拉唔出絲，但味道香濃，鍾意食芝士嘅朋友都一定要試吓。芝麻雞翼就同其他日本餐廳嘅分別唔大，但都好好食。牛肉石頭鍋本身嘅牛肉係生嘅，需要靠石頭鍋嘅熱力去炒熟佢。旁邊會有一個燒肉汁，炒嘅時候可以林埋落去，配合埋燒肉汁嘅牛肉飯非常香口。但始終係石頭鍋拌飯，食嘅時候始終會口乾同要不停飲水。不過店員都好好會主動幫我加水。朋友食嘅係滑蛋豬扒定食，定食餐會包埋大豆、沙律、白飯及湯。丼丼屋嘅豬扒一向都非常厚身，好香口而且唔會太油膩，喜歡食豬扒嘅朋友不妨一試。